അന്തര്ദേശീയം
ഇന്ത്യക്കുനേരെ തീരുവഭീഷണി ഉയര്ത്തി ഡൊണാള്ഡ് ട്രംപ്
ന്യുഡല്ഹി: ഇന്ത്യക്കുനേരെ വീണ്ടും തീരുവഭീഷണി ഉയര്ത്തി അമേരിക്കന് പ്രസിഡന്റ് ഡൊണാള്ഡ് ട്രംപ്. ഇന്ത്യക്കു മേല് ചുമത്തിയ തീരുവ ഉയര്ത്തുമെന്ന് തന്റെ സാമൂഹികമാധ്യമമായ സോഷ്യലില് അദ്ദേഹം വ്യക്തമാക്കി. റഷ്യയില്നിന്ന് ഇന്ത്യ എണ്ണ വാങ്ങുന്നത് ചൂണ്ടിക്കാണിച്ചാണ് യുഎസ് പ്രസിഡന്റിന്റെ നീക്കം. യുക്രൈനിലെ കൂട്ടക്കൊല നിര്ത്താന് എല്ലാവരുമാവശ്യപ്പെടുന്ന സാഹചര്യത്തില്പ്പോലും റഷ്യയില്നിന്ന് ഇന്ത്യ കൂടുതല് ഇന്ധനം വാങ്ങിക്കൊണ്ടിരിക്കുന്നെന്നും യുക്രൈനില് കൊല്ലപ്പെടുന്നവരേക്കുറിച്ച് ഇന്ത്യക്ക് ആശങ്കയില്ലെന്നും ട്രംപ് കുറ്റപ്പെടുത്തി.
അതേസമയം, നികുതി ഭീഷണി മുഴക്കിയ യു.എസ് പ്രസിഡന്റ് ഡോണള്ഡ് ട്രംപിന് ശക്തമായ മറുപടിയുമായി ഇന്ത്യ രംഗത്തെത്തി. അമേരിക്കയും യൂറോപ്യന് യൂണിയനും റഷ്യയുമായി വ്യാപാര ബന്ധം തുടരുന്നുണ്ടെന്നും ഇരട്ടത്താപ്പ് അംഗീകരിക്കാനാവില്ലെന്നും വിദേശകാര്യ മന്ത്രാലയം വ്യക്തമാക്കി. ഈ സാഹചര്യത്തില് ഇന്ത്യയെ കുറ്റപ്പെടുത്തുന്നത് നീതീകരിക്കാനാകില്ലെന്നും മറ്റു പ്രധാന സാമ്പത്തികശക്തികളെപ്പോലെ ഇന്ത്യക്കും രാജ്യതാത്പര്യങ്ങളും സാമ്പത്തിക സുരക്ഷിതത്വവും പരിഗണിക്കേണ്ടതുണ്ടെന്നും വിദേശകാര്യ മന്ത്രാലയം പ്രസ്താവനയില് പറഞ്ഞു.
