ദേശീയം
പരസ്യ ബോര്ഡിനുള്ളില് പെട്ട് മരിച്ചവരുടെ എണ്ണം 14 ആയി
മുംബൈ: ശക്തമായ പൊടിക്കാറ്റിനെ തുടര്ന്ന് തകര്ന്ന് വീണ പരസ്യ ബോര്ഡിനുള്ളില് പെട്ട് മരിച്ചവരുടെ എണ്ണം ഉയരുന്നു. പുതിയ കണക്ക് പ്രകാരം 14 പേര് മരിച്ചു. 60 ഓളം പേര്ക്ക് പരിക്കേറ്റു. ഇതില് ഒരാളുടെ നില ഗുരുതരമാണ്. അവശിഷ്ടങ്ങള്ക്കിടയില് കുടുങ്ങി കിടന്ന എട്ട് മൃതദേഹങ്ങള് പുറത്തെടുത്തുവെന്നും നാല് പേരുടെ കൂടി മൃതദേഹം പുറത്തെടുക്കാനുണ്ടെന്നും അധികൃതര് അറിയിച്ചു. ദേശീയ ദുരന്ത നിവാരണ സേനയും പൊലീസും രക്ഷാ പ്രവര്ത്തനം തുടരുകയാണ്.
നഗരത്തിലെ പെട്രോള് പമ്പിന് സമീപം സ്ഥാപിച്ച കൂറ്റന് പരസ്യബോര്ഡാണ് തകര്ന്ന് വീണത്. ഇന്ധനം നിറയ്ക്കുന്നതിനും മറ്റുമായി എത്തിയ വാഹനങ്ങള്ക്കു മുകളിലേക്കാണ് പരസ്യബോര്ഡ് വീണത്. അപകടത്തില് മഹാരാഷ്ട്ര സര്ക്കാര് ഉന്നത തല അന്വേഷണം പ്രഖ്യാപിച്ചു. പരിക്കേറ്റവര്ക്കുള്ള ചികിത്സ സര്ക്കാര് ഉറപ്പുവരുത്തും. മരിച്ചവരുടെ കുടുംബത്തിന് അഞ്ച് ലക്ഷം രൂപ ധനസഹായം നല്കും. മുംബൈയിലെ എല്ലാ പരസ്യ ബോര്ഡുകളും പരിശോധിക്കാന് പൊലിസിന് നിര്ദ്ദേശം നല്കിയിട്ടുണ്ടെന്നും മുഖ്യമന്ത്രി അറിയിച്ചു.
