കേരളം
സംസ്ഥാന സ്കൂള് ശാസ്ത്രമേളയ്ക്ക് പാലക്കാട് തുടക്കം
പാലക്കാട്: സംസ്ഥാന സ്കൂള് ശാസ്ത്രമേളയ്ക്ക് പാലക്കാട് തുടക്കം. മേളയുടെ ഔദ്യോഗിക ഉദ്ഘാടനം മന്ത്രി വി. ശിവന്കുട്ടി നിര്വഹിച്ചു. 14 ജില്ലകളില് നിന്നായി പതിനായിരത്തോളം ശാസ്ത്ര പ്രതിഭകളാണ് പങ്കെടുക്കുന്നത്. ശാസ്ത്രം, ഗണിതം, ഐടി, പ്രവൃത്തി പരിചയം, സാമൂഹ്യശാസ്ത്രം, വൊക്കേഷണല് വിഭാഗങ്ങളിലാണ് മത്സരങ്ങള്. മന്ത്രിമാരായ വി. ശിവന് കുട്ടി, എം.ബി. രാജേഷ് എന്നിവര്ക്കൊപ്പം പാലക്കാട് എം.എല്.എ. രാഹുല് മാങ്കൂട്ടത്തിലും ചടങ്ങില് പങ്കെടുത്തു.
അടുത്ത വര്ഷം മുതല് ശാസ്ത്ര മേളയ്ക്ക് ഏറ്റവും കൂടുതല് പോയിന്റ് വാങ്ങുന്ന ജില്ലയ്ക്ക് സ്വര്ണ്ണ കപ്പ് നല്കുമെന്നും ശാസ്ത്രമേളയില് വിജയികള്ക്ക് നല്കുന്ന കാഷ് പ്രൈസ് ഉയര്ത്തുന്ന കാര്യം ആലോചിക്കുമെന്നും പൊതു വിദ്യാഭ്യാസ തൊഴില് വകുപ്പ് മന്ത്രി വി. ശിവന്കുട്ടി അറിയിച്ചു. പൊതു വിദ്യാഭ്യാസ വകുപ്പിന്റെ നേതൃത്വത്തില് 57-ാമത് സംസ്ഥാന സ്കൂള് ശാസ്ത്രോത്സവം പാലക്കാട് ഗവ. മോയന് ഗേള്സ് ഹയര് സെക്കന്ഡറി സ്കൂളില് ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.
അതേസമയം, സംസ്ഥാന സ്കൂള് കായികമേളയില് പ്രായത്തട്ടിപ്പ് നടന്നതായി പൊതുവിദ്യാഭ്യാസവകുപ്പിന്റെ കണ്ടെത്തല്. കായികമേളയില് മെഡല് നേടിയ ഉത്തര്പ്രദേശുകാരി ജ്യോതി ഉപാധ്യ പ്രായത്തട്ടിപ്പ് നടത്തിയതായാണ് കണ്ടെത്തല്. സീനിയര് പെണ്കുട്ടികളുടെ 100 മീറ്റര്, 200 മീറ്റര് മത്സരങ്ങളില് ജ്യോതി വെള്ളി മെഡല് നേടിയിരുന്നു. ഈ ഇനങ്ങളില് നാലാം സ്ഥാനം നേടിയ മത്സരാര്ഥികളാണ് നേരത്തേ സംഘാടകര്ക്ക് പരാതി നല്കിയത്.
