ദേശീയം
ജാമ്യത്തിന്റെ പകര്പ്പ് എത്തിയില്ല: ആര്യന് ഖാന്റെ ജയില്മോചനം നാളെ
മുംബൈ: ആഡംബര കപ്പലിലെ ലഹരി മരുന്ന് കേസില് ഷാരൂഖ് ഖാന്റെ മകന് ആര്യന് ഖാന്റെ ജയില്മോചനം നാളെ. ജാമ്യത്തിന് പകര്പ്പ് കൃത്യസമയത്ത് ആര്തര് റോഡ് ജയിലില് എത്തിക്കാന് അഭിഭാഷകര്ക്ക് കഴിഞ്ഞില്ല.
കോടതി നടപടികള് നാലുമണിയോടെ പൂര്ത്തിയായെങ്കിലും ജാമ്യത്തിന്റെ പകര്പ്പ് അഞ്ചരയ്ക്ക് മുമ്പ് ജയിലില് എത്തിക്കണമായിരുന്നു.
ഈ സാഹചര്യത്തിലാണ് ജയില്മോചനം ഒരു ദിവസം വൈകിയത്.
അര്യനു വേണ്ടി നടി ജൂഹി ചൗള ആള്ജാമ്യം നിന്നു. 14 ഉപാധികളോടെയാണ് ബോംബെ ഹൈക്കോടതി ആര്യന് അടക്കമുള്ള മൂന്ന് പ്രതികള്ക്കും ജാമ്യം അനുവദിച്ചത്. രാജ്യം വിട്ടു പോകരുത്, പാസ്പോര്ട്ട് കോടതിയില് കെട്ടിവെക്കണം, വെള്ളിയാഴ്ച അന്വേഷണസംഘത്തിന് മുന്നില് ഹാജരാകണം തുടങ്ങിയ വ്യവസ്ഥകള് പ്രകാരമാണ് ജാമ്യം അനുവദിച്ചത്.
കേസ് സംബന്ധിച്ച് മാധ്യമങ്ങളില് അനാവശ്യ പ്രസ്താവനകള് നടത്താന് പാടില്ല. മുംബൈ വിട്ട് പുറത്തുപോകേണ്ടി വന്നാല് അന്വേഷണ ഉദ്യോഗസ്ഥനെ വിവരമറിയിക്കണം. ഇതോടൊപ്പം ഒരു ലക്ഷം രൂപ കെട്ടി വയ്ക്കണമെന്നിങ്ങനെയും ജാമ്യവ്യവസ്ഥകള് ഉണ്ട്.
ഏതെങ്കിലും വ്യവസ്ഥകള് ലംഘിക്കപ്പെട്ടാല് ജാമ്യം റദ്ദാക്കാന് എന്.സി.ബിക്ക് കോടതിയെ സമീപിക്കാം.
