കേരളം
കലാമണ്ഡലം സത്യഭാമ കോടതിയില് ഹാജരായി
എറണാകുളം: മോഹിനിയാട്ടം കലാകാരന് ആര്.എല്.വി. രാമകൃഷ്ണനെ ജാതീയമായി അധിക്ഷേപിച്ച കേസില് മോഹിനിയാട്ടം നര്ത്തകി കലാമണ്ഡലം സത്യഭാമ കോടതിയില് ഹാജരായി. ഹൈക്കോടതി നിര്ദേശത്തെ തുടര്ന്നാണ് ഇവര് കോടതിയില് ഹാജരായത്. കേസില് സത്യഭാമയുടെ മുന്കൂര് ജാമ്യാപേക്ഷ കോടതി നേരത്തെ തള്ളിയിരുന്നു.
നെടുമങ്ങാട് എസ്സി എസ്ടി പ്രത്യേക കോടതിയില് ഒരാഴ്ചയ്ക്കുള്ളില് ഹാജാരാകാനാണ് ജസ്റ്റിസ് കെ.ബാബു നിര്ദേശിച്ചത്. ജാമ്യാപേക്ഷ നല്കിയാല് അന്നുതന്നെ തീര്പ്പാക്കാനും നെടുമങ്ങാട് കോടതിക്ക് ഹൈക്കോടതി നിര്ദേശം നല്കിയിരുന്നു. ഒരു യൂട്യൂബ് ചാനലിന് നല്കിയ അഭിമുഖത്തിലാണ് ആര്.എല്.വി രാമകൃഷ്ണനെതിരെ സത്യഭാമ ജാതി അധിക്ഷേപം നടത്തിയത്. സംഭവത്തില് പട്ടികജാതി പട്ടികവര്ഗ അതിക്രമം തടയല് നിയമം പ്രകാരം ജാമ്യമില്ലാ വകുപ്പ് ചേര്ത്താണ് തിരുവനന്തപുരം കന്റോണ്മെന്റ് പൊലീസ് കേസ് രജിസ്റ്റര് ചെയ്തത്.
