കോവിഡില്‍ നേട്ടംകൊയ്ത് ഡിജിറ്റല്‍ പണമിടപാടുകള്‍

കോവിഡ് കാലത്ത് ഇന്ത്യയില്‍ ഡിജിറ്റല്‍ പണമിടപാടുകള്‍ കുതിച്ചുകയറിയത് എക്കാലത്തെയും ഉയരത്തിലേക്ക്. യൂണിഫൈഡ് പേമെന്റ്സ് ഇന്റര്‍ഫേസ് (യു.പി.ഐ) വഴിയുള്ള പണം കൈമാറ്റം ഡിസംബറില്‍ എട്ടുലക്ഷം കോടി രൂപയെന്ന നാഴികക്കല്ലും മറികടന്നു.

നാഷണല്‍ പേമെന്റ്‌സ് കോര്‍പ്പറേഷന്‍ ഒഫ് ഇന്ത്യയുടെ കണക്കനുസരിച്ച് ഡിസംബറിലെ യു.പി.ഐ ഇടപാടുമൂല്യം 8.26 ലക്ഷം കോടി രൂപയാണ്. 3,874 കോടി യു.പി.ഐ ഇടപാടുകള്‍ 2021ല്‍ ആകെ നടന്നു. ഇത് സര്‍വകാല റെക്കോഡാണ്. 2020ലെ 1,887 കോടിയേക്കാള്‍ 105 ശതമാനമാണ് വളര്‍ച്ച. ഇടപാടുമൂല്യം 2020ലെ 31 ലക്ഷം കോടി രൂപയില്‍ നിന്ന് 130 ശതമാനം വര്‍ദ്ധിച്ച് 71.46 ലക്ഷം കോടി രൂപയിലെത്തി.