കേരളം
ശബരിമല സ്വര്ണക്കൊള്ള: ഉണ്ണികൃഷ്ണന് പോറ്റിയെ ഇന്ന് ഹാജരാക്കും
പത്തനംതിട്ട: ശബരിമല സ്വര്ണക്കൊള്ളയില് പ്രത്യേക അന്വേഷണ സംഘത്തിന്റെ കസ്റ്റഡിയിലുള്ള ഉണ്ണികൃഷ്ണന് പോറ്റിയെ ഇന്ന് റാന്നി കോടതിയില് ഹാജരാക്കും. 14 ദിവസത്തെ കസ്റ്റഡി കാലാവധി കഴിയുന്ന സാഹചര്യത്തിലാണ് കോടതിയില് ഹാജരാക്കുന്നത്. ദ്വാരപാലക പാളികളിലെ സ്വര്ണ കൊള്ളയ്ക്ക് പുറമെ കട്ടിള പാളികളിലെ സ്വര്ണ കവര്ച്ചയില് കൂടി പോറ്റിയെ അറസ്റ്റ് ചെയ്യാനുള്ള അപേക്ഷ എസ്ഐടി ഇന്ന് കോടതിയില് നല്കിയേക്കും.
മുരാരി ബാബുവിനെ രണ്ട് കേസുകളിലും അറസ്റ്റ് ചെയ്തിട്ടുണ്ട്. ഇരുവരെയും ഒരുമിച്ചുള്ള ചോദ്യം ചെയ്യലാണ് കഴിഞ്ഞ ദിവസങ്ങളില് നടത്തിയത്. സ്വര്ണപാളികള് ചെമ്പ് പാളികള് എന്ന് രേഖപ്പെടുത്തിയതിലെ ഗൂഢാലോചനയിലാണ് ചോദ്യം ചെയ്യല്. നേരത്തെ ബെംഗളൂരു, ചെന്നൈ എന്നിവിടങ്ങളില് നടത്തിയ പരിശോധനയില് ഉണ്ണികൃഷ്ണന് പോറ്റിയും കൂട്ടാളികളും കവര്ച്ച ചെയ്ത സ്വര്ണത്തിന് തത്തുല്യമായ സ്വര്ണം പ്രത്യേക സംഘം കസ്റ്റഡിയിലെടുത്തിരുന്നു.
അതേസമയം, തന്ത്രി കണ്ഠരര് രാജീവരരുടെ കൈവശമുണ്ടായിരുന്ന പഴയ കൊടിമരത്തിലെ ശബരിമല വാജിവാഹനം തിരിച്ചെടുക്കാനുള്ള ചുമതല തിരുവാഭരണം കമ്മീഷണര്ക്ക് തിരുവിതാംകൂര് ദേവസ്വം ബോര്ഡ് നല്കി. ഇന്നലെ ചേര്ന്ന ബോര്ഡ് യോഗമാണ് ചുമതല തിരുവാഭരണം കമ്മീഷണര്ക്ക് നല്കിയത്. 2017 ല് കൊടിമരം മാറ്റിസ്ഥാപിച്ചപ്പോഴാണ് പഴയ വാജിവാഹനം തന്ത്രിക്ക് കൈമാറിയത്. വിവാദങ്ങളെ തുടര്ന്ന് വാജിവാഹനം തിരികെ വാങ്ങണമെന്ന് തന്ത്രി കണ്ഠരര് രാജീവരര് ശബരിമല എക്സിക്യൂട്ടീവ് ഓഫിസര്ക്ക് കത്ത് നല്കിയിരുന്നു.
