കേരളം
സര്ക്കാര് ആശുപത്രികളിലെ ഡോക്ടര്മാര് സമരത്തിലേക്ക്
തിരുവനന്തപുരം: കേരള സര്ക്കാര് ആശുപത്രികളിലെ ഡോക്ടര്മാര് സമരത്തിലേക്ക്. ആശുപത്രികളിലെ സുരക്ഷാ വീഴ്ചകള് പരിഹരിക്കണമെന്നാവശ്യപ്പെട്ടാണ് കെ.ജി.എം.ഒ.എ. സമരം നടത്തുന്നത്. ജീവന് രക്ഷാ എന്ന പേരില് ഇന്നുമുതല് സമരം ആരംഭിക്കും. താമരശ്ശേരി താലൂക്ക് ആശുപത്രി ഡോക്ടര്ക്കെതിരെ ഉണ്ടായ ആക്രമണത്തിന്റെ പശ്ചാത്തലത്തിലാണ് സമരം.
ആദ്യഘട്ടം എന്ന നിലയില് സംസ്ഥാനവ്യാപകമായി രോഗീപരിചരണം ഒഴികെയുള്ള മറ്റ് ഡ്യൂട്ടികളില് നിന്ന് വിട്ടു നില്ക്കും. ആരോഗ്യപ്രവര്ത്തകരുടെ ജീവന് സുരക്ഷ ഉറപ്പാക്കാന് വേണ്ട നടപടികള് യുദ്ധകാലാടിസ്ഥാനത്തില് സ്വീകരിക്കണമെന്നാണ് സംഘടനയുടെ ആവശ്യം. ആരോഗ്യ പ്രവര്ത്തകര്ക്ക് സുരക്ഷിതമായ തൊഴിലിടങ്ങള് ഉറപ്പാക്കുന്നതില് സര്ക്കാര് സംവിധാനങ്ങള് പരാജയപ്പെട്ടതായി സംഘടന ആരോപിച്ചു.
ആശുപത്രികളെ അതിസുരക്ഷാ മേഖലകളായി പ്രഖ്യാപിക്കണം. പ്രധാന ആശുപത്രികളുടെ സുരക്ഷാ ചുമതല സ്റ്റേറ്റ് ഇന്ഡസ്ട്രിയല് സെക്യൂരിറ്റി ഫോഴ്സിനെ ഏല്പ്പിക്കണം തുടങ്ങിയ ആവശ്യങ്ങള് സര്ക്കാര് നടപ്പിലാക്കാത്തതിലും പ്രതിഷേധം അറിയിക്കും.
